|
Now, Kennedy, if foot or horse
E'er bring you in by Mauchlin Corss
(Lord, man, there's lasses there wad force
A hermit's fancy;
And down the gate in faith! they're worse
An' mair unchancy):
But as I'm sayin, please step to Dow's
An' taste sic gear as Johnie brews,
Till some bit callan bring me news
That ye are there;
An' if we dinna hae a bouze,
I'se ne'er drink mair.
It's no I like to sit an' swallow,
Then like a swine to puke an' wallow;
But gie me just a true guid fallow
Wi' right ingine
And spunkie ance to mak us mellow,
An' then we'll shine!
Now if ye're ane o' warl's folk,
Wha rate the wearer by the cloak,
An' sklent on poverty their joke
Wi' bitter sneer,
Wi' you nae friendship I will troke,
Nor cheap nor dear.
But if, as I'm informed weel,
Ye hate as ill's the vera Deil
The flinty heart that canna feel-
Come, sir, here's tae you!
Hae, there's my han', I wiss you weel,
An' Gude be wi' you!
Poem Index
|